شرقپور کی فصیل مشرقی جانب بنائے جانے لگی تو حضرت بابا شاہ محمد مراد ؒ نے حافظ محمد جمال سے فرمایا کہ یہاں ایک چھوٹی سی کھڑکی رکھی جائے تا کہ ادھرسے ہمارا آنا جانا رہے۔ چنانچہ ان کے کہنے پر کھڑکی رکھ دی گئی۔ جسے لوگ کچی دروازہ کہتے تھے۔ جب محلہ ہرنی شاہ کی بھر پور آبادی ہو گئ تو اس دروازی کی جگہ بڑا دروزاہ بنا دیا گیا۔ لیکن پھر بھی اس دروازے کو کچی دروزاہ ہی بولا جاتا رہا۔ لوگوں کا اس دروازے کے بارے میں عقیدہ تھا کہ اگر کسی بیمار بچے کو اس دروازے میں گزار لیا جاتا تو وہ ٹھیک ہو جاتا تھا۔ چونکہ اس دروازے کی سیدھ میں لاھور شہر پڑتا ہےاس لیے اس کو لاہوری دروازہ کا نام بھی دیا گیا۔ مگر یہ نام نہ پنپ سکا۔ اب اس دروازے کا نام دروازہ حضرت میاں ہرنی شاہ رکھا گیا ہے۔ اس دروازے میں سے کئی بزرگوں کا گزر رہا ہے۔ حٖضرت میاں شاہ محمد مرادؒ، حضرت میاں ہرنی شاہؒ، حضرت میاں روشن دینؒ، حضرت میاں غلام مصطفٰے اور حضرت میاں نیک محمد نوشاہیؒ کی رہائشیں اسی محلہ میں تھیں۔ ان کا گزر شام وسحر اس دروازہ سے ہوتا تھا۔ یہ ان بزرگوں کا تصرف لگتا ہے کہ اس محلے میں داخل ہوں تو دلوں کو سکون ملتا ہے۔

یہ دروازہ ملک نین یعنی ملک حسن علی مرحوم کے اباو اجداد کے آنے پر بنایا گیا۔ چونکہ ان کی زمینیں اس طرف زیادہ تھیں۔ اس لیے انہوں نے اپنے رہائشی مکان بھی اس طرف بنائے تھے۔ روشنائی دروازے میں سے گزر کر آنا انہیں دور کا فاصلہ پڑتا تھا۔ یہ دروازہ بھی کچی فصیل میں تھا۔ مگر یہاں نہیں تھا جہاں اب ہے بلکہ محلہ الیاس اور میاں عبدالطیف کھراونا والی گلیوں کے قریب تھا۔ یہ دروازہ کوئی اتنا اونچا اور بڑا بھی نہ تھا۔ جتنا کہ روشنائی دروازہ۔ تاہم گھروں کے دروازوں کی نسبت بڑا تھا۔ یہ بات عام مشہور ہے کہ جب میاں محمد اسماعیل کابلی کی شادی ہوئی تو ہاتھی پر سواری کر کے بارات لے گیا تھا۔ اس کی بارات

فیض پور کلاں میں گئی تھی۔ ہاتھی اس دروازے میں سے گزر نہیں سکتا تھا۔ لہذا اس دروازے کو گرا کر دولہا میاں کا ہاتھی گزارا گیا۔ ازاں بعد موجودہ جگہ پر یہ دروازہ بنایا گیا۔ دروازے کی تعمیر ملک محمد الیاس، حکیم شیر علی اور حافظ احمد یار کے اہتمام سے ہوئی۔ اس دروازے کے لئے اینٹیں میاں محمد اسماعیل کابلی نے اپنے بھٹے سے مفت فراہم کی تھیں۔ یہ دروازہ محراب نما ہے۔ اندر کی جانب کوئی مسقف جگہ نہیں ہے اس کے پٹ روشنائی دروازے کی طرح زیادہ مضبوط نہ تھے۔ پاکستان بننے کے بعد تک یہ پٹ موجود تھے مگر اب نہیں ہیں۔ دروازہ شہر کی مشرقی جانب بنا ہوا ہے۔ شہر سے آنے والا بازار ڈھلوان پر ہے۔ جس کے باعث دروازے کی جانب برھتے لوگ بھاگتے ہوئے لگتے ہیں۔ جب سورج نکل رہا ہوتا ہے تو اس کی کرنیں ان باہر نکلنے والے لوگوں کے ماتھے کو چوم لیتی ہیں۔ اس دروازے کے باہر محلہ حکیم گڑھی آباد ہے۔ اسی وجہ سے بعض لوگ اسے حکیم گڑھی والا دروازہ بھی کہتے ہیں۔ اس دروازے کے سامنے ملکانہ ڈیرہ واقع ہے۔ جو کہ سرکلر روڑ کے دائیں پہلو میں ہے۔ اس دروازے کو رہتی دنیا تک یہ اعزاز ضرور حاصل رہے گا کہ یہاں کے ولی کامل اعلیٰ حضرت میاں شیر محمد شرقپوری رحمتہ اللہ علیہ جن کی رہائش گاہ قریب ہی تھی، اس دروازے میں سے صبح شام گزرا کرتے تھے۔ حضرت قبلہ ثانی صاحبؒ میاں غلام اللہ بھی اسی دروازے میں سے گزرا کرتے تھے۔ اور آپ کے مریدین بھی اسی دروازے سے گزر کر آپ سے ملاقات کیا کرتے تھے۔ ان ملنے والوں میں نہ جانے کون کون سے عظیم لوگ شامل تھے۔ مولانا اصغر روحی، حکیم نیرواسطی، ڈاکٹر محمد یوسف، شاعر مشرق علامہ اقبالؒ، سر محمد شفیع، مولانا سید انور شاہ کاشمیری کا گزر بھی اس دروازے سے ہوا تھا۔

یہ دروازہ شہر کے جنوب مغرب میں واقع ہے۔ یہ اس وقت بنا جب ملکانہ دروازہ بن چکا تھا۔ اسی لیے اسے نواں دروازہ کہتے ہیں۔ چونکہ اس دروازے کے قریب مسجد گجرانوالی موجود تھی جو گجروں نے بنائی تھی اس کے علاوہ ایک مدرسہ بھی ان کی نگرانی چل رہا تھا۔ لہذا اس مناسبت سے اس دروازے کو گجرانوالہ دروازہ بھی کہا جاتا ہے۔ علاوہ ازیں اس دروازے کے آس پاس ریوڑی خاندانوں کے گھر بھی آباد ہیں ۔ اس لیے کوشش کی گئی کہ اسے دروازہ ریوڑیاں کہا جائے۔ مگر ایسا نہ ہوسکا۔ کچھ لوگ اسے گوجرانوالہ کہتے ہیں اور کچھ نواں دروازہ۔ تاہم ان دنوں نواں دروازہ زیادہ مشہور ہے۔ یہ دروازہ اس طرز کا بنا ہوا ہے جس طرز کا پرانی سبزی منڈی والا دروازہ یا روشنائی دروازہ ہے۔ حاٖفظ بابا غلام یسین نے اس دروازے کے ملحق باہر جانب اپنا مکان بنایا۔

مکان بازار کے دونوں جانب دائیں بائیں تھا۔ لہذا بازار مسقف بن گیا ہے بارش ہوتی ہے تو بھیگ جانے والے اس کے نیچے پنا لیتے ہیں۔ حافظ بابا غلام یسینٰ، ملک منور علی، ملک سرفراز احمد (سابقہ ایم پی اے اور ایم این اے) اور ملک افتخار احمد (سابقہ چیرمین بلدیہ شرقپور شریف) کے والد ماجد ہیں۔ اب یہ مکان ملک افتخار احمد کے حصے میں آگیا ہے۔ انہوں نے اس کی تعمیر نو کی ہے اور نیچے شاندار مارکیٹ بن گئی ہے۔ جہاں مختلف کاروبار کی دوکانیں چل رہی ہیں۔ ملک افتخار احمد جب بلدیہ شرقپور کے چیرمین تھے انہوں نے اس دروازے کی جانب خاص توجہ فرمائی اور اس کی تعمیر نو کی اور چینی کی ٹائلیں لگوا کر اس کے حسن کو دوبالا کیا۔ اور اس کے دائیں بائیں دوکانیں بنوائیں جن کا کرایہ بلدیہ شرقپور کو جمع ہوتا ہے۔ اس کی تعمیر نو پر 7 نومبر 1992 میں رسم افتتاح ادا کی گئی۔ اس کے علاوہ اس دروازے کے باہر کبھی محصول چونگی ہوا کرتی تھی۔ اس جگہ پر بھی دوکانیں بنوادی گئیں ہیں۔ جہاں سے ہر ماہ کمیٹی کو کرایہ مل رہا ہے۔ اس دروازے کے باہر حافظ غلام یسینٰ کا ڈیرہ بھی تھا۔ جسے ملک سرفراز احمد صاحب نے جدید طرز میں بنایا۔ جہاں اب نیشنل بینک آف پاکستان بنا ہوا ہے۔ اور ڈیرہ ہسپتال روڑ پر منتقل ہو گیا ہے۔ اس دروازے کے باہر سرکلر روڑ ہے جو پرانے کاغذوں میں مانگٹانوالہ روڑ تھی۔ ازاں بعد اسے بازار حافظاں بھی کہا گیا۔ مگر یہ دونوں نام لوگوں کی زبان پر پنپ نہ پائے۔ البتہ دربار روڑ کا نام زیادہ مشہور ہو گیا۔ اس سڑک کے آخر میں ولی کامل اعلیٰ حضرت میاں شیر محمد شیرربانی رحمتہ اللہ علیہ کا دربار عالیہ ہے۔